تعبت من مشاهدة فيديوهات عن التسويق والمبيعات وكلها بتنتهي بدون خطوات واضحة
لـ تبيع خدمتك , كتابك الالكتروني أو حتى منتجك الرقمي على نت مود ؟
اليوم رح أشرح لك كيف تبيع خدمتك، أو منتجك الرقمي، أو كتابك الالكتروني لأول 5 أشخاص
- بدون إعلانات
- بدون جمهور
- وبدون ما تحس حالك عم تشحد مبيعات من العالم !
وح خبرك على 10 خطوات , كلهم مرتبطين ببعض على شكل نظام واستراتيجية لنجاحك في الحصول على مبيعات عملاء
وبالنهاية رح خبرك نصيحة مهمة حول الخطوات كلهم !
الخطوة 1: اجمع كل جهات الاتصال
افتح إيميلك، جوالك، وحسابات السوشيال ميديا.
أي حدا كنت على تواصل معه—أصدقاء، زملاء دراسة، عملاء قدامى، متابعين…
هدول أول ناس ممكن يساعدوك.
مثال:
- عندك 300 شخص على إنستقرام ؟
- 150 جهة اتصال على جوالك ؟
- 200 صديق على الفيسبوك
- عندك 50 شخص على تلغرام أو لينكد ان !
- هدول أكثر من كفاية لتبدأ.
الخطوة 2: اختر منصة التواصل
اختر المنصة اللي فيها أكبر عدد من هالناس والمعارف عندك .
- ممكن واتساب
- ممكن ايميلك
- ممكن الفيسبوك
- ممكن لينكد ان او تلغرام
انت رح تبدأ من هذه المنصة لي فيها اكبر عدد من الاشخاص عندك والمعارف !
الخطوة 3: خصّص الرسالة
هلا وقت التواصل مع هذه الاشخاص عن طريق ارسال رسالة شخصية !
خلي كل رسالة فيها لمسة شخصية و ما تبعت “مرحبا عندي منتج أو عندي خدمة …. !
شوف شو المشترك بينك و بين الشخص ، وابدأ منه
أمثلة :
- شفت إنك صرتي ام مؤخرًا , مبروك ! انشالله ما عم يعزبك وعم تعرفي ديري وقتك وتنظميه : بالمناسبة، عم بشتغل على كتاب رقمي عن تنظيم الوقت للأمهات وخصوصاً لي عندهم بيبي وبعده صغير ، حابة أسمع رأيك .
- بعرف إنك صاحب مشروع صغير , ولله مشروع الصغير محتاج شغل وظهور كمان اون لاين , هل بدأت تعمله فيديوهات , بتعرف الفيديو هل الايام كل شي بالتسويق , وانا عم بقدم خدمة مونتاج فيديو بأسعار رمزية كبداية، حبيت أشوف إذا فيك تستفيد أو بتعرف حدا مهتم ؟
الخطوة 4: ابعث 100 رسالة يوميًا
ما تنتظر حدا ! ابعت رسائل شخصية لـ 100 شخص كل يوم وتواصل معهم !
الخطوة 5: لو ردوا عليك؟ سخّن المحادثة
استخدم استراتيجية ( أ أ أ ) : ألاحظ – أعجب – أطلب
شفت شغلك بمجال التصميم/الأكل الصحي/المتجر تبعك ( ألاحظ )
فعلاً مرتب وواضح إنك منظم ( أعجب )
أنا حالياً عامل مجموعة قوالب Excel جاهزة للمحاسبة ومتابعة الدخل والمصروف، مخصصة لرواد الأعمال الصغار، فـ فكرت يمكن تساعدك بتنظيم أمورك أو توفرلك وقت. حابب تشوفها؟ ( أطلب )
لو عم تحكي مع صاحب متجر إلكتروني:
“بما إنك بتبيع منتجات رائعة، بظن محتوى الوصف أو الإعلانات ممكن يلعب دور كبير بالمبيعات. حابب أساعدك تكتبه بطريقة تقنع الزبون يشتري بسهولة.”
أو مع مدرب أو كوتش:
“حبيت طريقة تواصلك مع متابعينك. عندي خبرة بكتابة محتوى يخلي الناس تتفاعل وتحجز. إذا حابب، ممكن أشاركك بعض الأفكار بدون التزام.”
الخطوة 6 : العرض المجاني أو السعر الرمزي
وهذه لي انا بفضلها كـ بداية
لو بتبيع خدمة: قدّمها لأول 3–5 عملاء مجانًا أو بسعر رمزي مقابل تقييم.
لو كتاب إلكتروني أو منتج رقمي (قالب، ملف، كورس): اعرضه بسعر مجاناً في البداية ، ووضح إن الهدف تاخد آراء وتقييمات.
وقول بعد فتره من الزمن رح تحدث الكتاب أو قالب وتعمله احترافي وبشكل مدفوع !
مثال عرض:
“أنا عم بقدّم نسخة تجريبية من كتابي الجديد عن ‘التغذية للأطفال مجاناً وهذا نسخة تجريبية ، مقابل تقييم صريح منك , ولكن بعد فتره رح يكون الكتاب بالنسخة الاحترافية ورح يكون سعره 20 دولار فقط
الخطوة 7 : إسأل إذا بيعرفوا حد
ممكن كمان تخبره الشخص :
لو بتحب انا ممكن اعطيك , نسبة 20% أو 30% أو 40% على كل طلب أو عميل أو مبيع من طرفك !
خبرني لو حابب , وهيك تفيديني وانا افيدك !
لو عم تبيع منتج أو خدمة ممكن تعطيه مباشرة عمولة لاي شخص بيجي من طرف هذا الشخص !
ولو عم تعمل شي احترافي و اونلاين وعندك برنامج تسويق بالعمولة خاص في متجرك !
- لو عم تبيع على متجر على نت مود رح يكون عندك برنامج التسويق بالعمولة بشكل مجاني , بس عليك تفعله
- لو عم عندك موقع أو متجر بدك تضيف برمجة خاصة , لو الموقع أو المتجر ما وفر هذه !
ممكن تدعيه للشخص يسجل معك كـ مسوق بالعمولة وباخد روابط الخاصة فيه , وبصير متجرك يتبع مباشرة المبيعات ويعطيه الارباح من خلال لوحة التحكم الخاصة فيه كـ مسوق !
الخطوة 8: اجمع تقييمات وارفع السعر تدريجيًا
بعد أول 5 مبيعات أو عملاء :
- اجمع تقييمات.
- استخدمها كدليل اجتماعي.
- بلش ترفع السعر من 5 → 15 → 20… وهكذا.
الخطوة 9: ارجع تواصل مع باقي القائمة
ارجع لكل اللي ما ردوا. الناس أحيانًا محتاجة بس دفشة. خاصة لما يشوفوا ناس فعليًا اشتروا أو استفادوا.
الخطوة 10: حافظ على التواصل واعمل علاقات جديدة
حتى اللي ما اشتروا، حافظ على علاقتك فيهم.
شارك نتائجك، تقييمات، قصص نجاح، وأي قيمة مفيدة ( على سوشيال ميديا )
اليوم ما اشترى
بكرا ممكن يكون أفضل عميل
وما تنسى تعمل علاقات جديدة , وتدخل العلاقات الجديدة في النظام هذا !
بالنهاية عندي ملاحظة مهمة
اذا مستحي انك تسوق لخدمتك , لمنتجك , لكتابك وتبدأ من الناس من لي تعرفهم
معناتها انت ما عم تقدم شي بجودة
معناتها انت رح تفشل عاجلاً ام أجلاً
اي شغلة رح تعملها وبدك ارباح بسرعة أو بدون جودة , ممكن تضرب معك شوي اذا عندك حظ
بس صدقني بعدين رح تفشل
وانت ما هذا لي بدك ياه
انت بدكك تبني شي من البداية بجودة , وصح , وتطوره على مدى السنوات لك , لاهلك , لولادك ويرفعوا راسون فيك !
فابدأ صح واعمل شي بجودة , واحفظ هذا الفيديو عندك كرمال تراجعه وتبدأ فيها للخطة هذه !
